Oblystyq ákimdikte ótken keńeste sóz alǵan Balalardyń quqyǵyn qorǵaý respýblıkalyq keńestiń ókili Rysty Jumabekova keńestiń basty mindeti balalardyń zańdy quqyqtary men múddelerin qorǵaý bolyp tabylatynyn atap kórsetti.
Aımaq basshysynyń orynbasary Rýslan Álishev jergilikti jerlerde balalarǵa jasalyp jatqan qamqorlyqtar jaıly baıandady. Jyl basynan beri 4826 az qamtylǵan otbasyǵa kómek kórsetilgen. Inklıýzıvti negizde bilim alatyn 2042 oqýshyǵa barlyq múmkindikter týdyrylǵan. Múmkindigi shekteýli balalar úshin resýrstyq ortalyq, psıhologııalyq ońaltý kabıneti jumys isteıdi.
«Jeti aıdyń ishinde bir jasqa deıin balasy bar 3424 anaǵa 351 mıllıon teńge mólsherinde járdemaqy tólendi. Az qamtylǵan otbasylardy materıaldyq qoldaý retinde 35 mıllıon teńge jumsaldy. Qosalqy sharýashylyqty damytý úshin 81 kópbalaly otbasy demeýqarjyǵa ıe boldy», dedi jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Gúlmıra Máýletbaeva.
Alaıda, bul salada kemshilikter de joq emes. Jyl basynana beri 4 balanyń densaýlyǵyna zaqym kelgen. 18 bala zań talaptaryn buzsa, 11-i urlyq-qarlyqpen aınalysqan. Jynystyq qatynasqa túsýdiń 14, jas balany azǵyrýdyń 1, zorlaýdyń 2 faktisi áshkerelengen.
Jıynda bala densaýlyǵyn mektepte qadaǵalaý ózekti máselelerdiń biri ekeni aıtyldy. Oqýshylar arasynda skalıoz, maıtaban, tirek-qımyl apparatynyń keselderi kóbeıip barady.
Saraptamalyq top músheleri ekikúndik sapar barysynda oblys ortalyǵymen qatar 5 aýdanda bolyp, 60-qa jýyq nysandy aralamaq.
Soltústik Qazaqstan oblysy
